یوسیف ایدریس‌له بیرگه  عرب  اؤیکوسونون  (قیسا ناغیل)  زیروه‌سینده دایانان زکریا تامئر 1931 سور‌یه ده دونیایا گؤز آچیب‌دیر. 1944 ده اوخولو بوش وئریب، 1958 دن اؤیکو یازماغا باشلاییب‌دیر. اؤیکو ایله یاناشی اوشاق  ادبیاتیندا دا یارادیجیلیغی اولوب و قیسا تنقیدی یازیلاری ‌دا یاییملانیب‌دیر.  1981 دن  بئریتانییادا یاشاییر.

آوروپا و عرب بیلیم یوردولاریندا، اونون  اؤیکولری اساسیندا یازیلان  لیسانس و دوکتورا  تئزی‌ ده آز اولماییب‌. اثرلری چوخلو دیل‌لره او جومله‌دن فیرانسیز، روس، آلمان، بولغار، ایتالیا، اسپانیولی، صرب  و... چئوریلیب‌دیر.

ایلک پئشه‌سی دمیرچی‌لیک اولوب، اولا بیلر تامئر (دمیر) سوی‌آدی‌ دا اونا اورادان چاتسین. آخی سوریه‌ده، اؤزلجه حلب شهرینده یاشایان تورک‌دیل‌لی‌لرین جمعیتی‌ آز دئییل.

اونو آرتیق  تانیماق اوچون سون گونلرده یازیشدیغیم اولکر اوجقار خانیمین مکتبونون بیر بؤلومونو بورادا یئرلشدیرمک  یئرینه دوشر : « زکریا تامرین یازیلاری تکجه شرق‌ده دئییل باتی اؤلکه‌لرینده ده بینیلیر حتی اورادا بورادان چوخ سئویلیرده دئمک اولار.  اؤزللیکله بو آدامین یازی ایستیلی وسئچدیی قونولار بیزیم سینیق سالخاق ادبیاتا فرانسیزجا، روسجا یا انگلیزجه دن چئویریلن اؤیکولردن آرتیق فایدالی اولاجاغینی دوشونورم... گؤردویوم انگلیزجه چئویریلرده  تامرین دیلینین چوخ ساده وحتی بعضی بیلگینلره گوره فولکلورا یاخین بیر سوییه‌سی وار. بورخئس‌له توتوشدورولان بو یازارین متنینده بیر آزدا اولان اوستولوک و آیرونی گؤزله‌نیلیر.»

قافلان‌لار اونونجو گونده

زکریا تامئر

چئویرن: سید حیدر بیات

مئشه‌لر، قفس ایچینده دوستاقلانمیش قافلاندان اوزاغا کؤچدولر.  او آنجاق اون‌لاری اونودا بیلمه‌دی. گؤزلرینی غضب‌له قفسی دؤوره‌له‌ین کیشی‌لره،زیلله‌دی. اونلارین گؤزو فوضولجا و قورخماز اونا باخیردی. کیشی‌لردن بیری سویوق قانلی، یوغرو بویوروجو بیر سس‌له دئدی: منیم پئشه‌می دوزگون اؤیرنمک ایسته‌سه‌نیز، ائییتمن‌‌لیک پئشه‌سینی، بیر شئیی هئچ زامان  اونوتمایین. دوشمانیزین قارنی بیرینجی آماجیز اولمالی. بو اؤنملی مسئله عین حالدا چتین و راحات‌ بیر مسئله‌دیر.

ایندی‌سه بو قافلانا باخین. بوینویوغون و دیکباش بیر قافلان‌دیر. آرتیق اؤزگورلویونه، گوجونه و هئیبیتینه گووه‌نن بیریسی‌‌دیر. بو ده‌ییشیب آنجاق خیرداجا بیر اوشاق کیمی سؤزه باخان اولاجاق. ایندی‌سه گؤرون الینده یئمک اولانلا اولمایانین آراسیندا نه‌لر کئچیر. گؤزقویوب اؤیره‌نین.

 کیشی‌لر ائییتمن‌‌لیک پئشه‌سینی اؤیرنمه‌یه، بئل‌لرینی برکدن باغلایاجاق‌لار دئییب، سؤز وئردیلر

ائییتمن‌ سئوینیب گولومسوندو. سونرا لاغا قویان بیر سس‌له قافلانا باخیب دئدی: عزیز قوناغیمیز، نئجه‌سن؟

قافلان دئدی: غذامی حاضیر ائله، یئمه‌ییمین واختی چاتیب.

ائییتمن‌ ساختا بیر دهشت‌له اونا باخیب: دوستاغیمدا اولااولا منه‌ فرمان وئریرسن؟ سن نه گولونج بیر قافلانسان، بورادا سؤز منیم سؤزومدور، فقط من فرمان وئره‌‌رم، بونو قولاغینا تاخ.

 قافلان دئدی: کیمسه قافلان‌لارا فرمان وئره بیلمز.
ائییتمن‌ دئدی: سن ایندی قافلان دئییل‌سن.

قفسه دوشدون، ایندی منیم سؤزومه باخماغا ساده‌ بیر قولسان.

قافلان اَینی آچیق دئدی: هئچ کسه قول اولمام.
ائییتمن‌: قاچاق یولون یوخدور، آخی من یئمک یییه‌سی‌یم.
قافلان: یئمه‌یینی ایسته‌میرم.
ائییتم‌ن: اولدو، سن‌دئیه‌ن اولسون، آج قال، سنی ایسته‌مه‌دی‌یین ایشه مجبور ائله‌میرم.

اؤیرنجی‌لرینه باخیب آرتیردی: گؤره‌جک‌سیز نئجه ده‌ییشر، دیک‌باشینان آج قارینی دویورماق اولماز.
آجالدی قافلان. حسرت‌له اؤزگور گونلرینی خاطیرلادی. یئل تکین، کیمی‌سی مانع اولمادان اوولارینی سالدیراردی.
ایکینجی گون ائییتمن‌له اؤیرنجی‌لری قفسین باشینا ییغیشدیلار. ائییتمن دئدی: آج دئییل‌سن؟ کسین آجسان، اینجیدیجی بیر آجلیق. دئگینن آجام، حاضیرلانمیش اتی سنه گتیرک.

قافلان سوسموشدو هله. ائییتمن‌ دئدی: سؤزه باخ، آخماق اولما، آجلیغینا اعتراف ائله، همن دویارسان.

قافلان دئدی: آجام

ائییتمن‌ گولوب اؤیرنجی‌لرینه: هه، او ایندی دوشر- چیخماز بیر توزاغین ایچینه دوشدو.
سونرا بویوردو قافلانا بوللو ات گتیردیلر.

اوچونجو گون ائییتمن‌ قافلانا دئدی: ایسته‌سن بو گون غذا یئیه‌سن، سؤزومه باخ.

قافلان دئدی: باخمارام

ائییتمن‌ دئدی: تلسمه، ایسته‌ییم کیچیک بیر ایستک‌دیر، چوخ کیچیک.
سن ایندی قفسده دولانیرسان، هر زامان دئدیم دایان، دایان.
قافلان اؤز اؤزونه دئدی: دوغرودان کیچیک بیر ایستک‌دیر، دیکباشلیق ائدیب آج قالماغیما ده‌یمز.
ائییتمن‌ آرتیق یوغور بیر سس‌له: دایان!

قافلان داش کیمی یئرینده قورودو. ائییتمن‌ سئویملی بیر سس‌له، ساغ اول! دئدی.

قافلان سئوینیب او گونون یئمه‌یینی یئدی. بویاندا ائییتمن‌ اؤیرنجی‌لره دئییردی: نئچه گوندن سونرا کاغیذ بیر قافلانا دؤنه‌جک‌.
دؤردونجو گون، قافلان ائییتمنه دئدی: من آجام، سن بویور دایانیم.
ائییتمن‌ اؤیرنجی‌لره دئدی: هه، ایندی دای منیم فرمان‌لاریمی سئویر. سونرا اوزونو چئویریب قافلانا دئدی: بو گون پیشک‌لرین مووولداماسینی یامیسلاماسان یئمک فیلان یوخ.

قافلان پیشیک‌لرین موولتوسونو یامیسلادی. ائییتمن‌ اوزونو تورشاتدی، بیه‌نمه‌یرکن دئدی: یاوا یامسیلیرسان. هاچاندان زیریلداماغا موولداماق دئییرلر؟ قافلان یئنه یامسیلادی، ائییتمن‌ بره‌لیب اونو دانلایا دانلایا: سوس! ساکیت اول!، هله ده یاوا یامسیلیرسان.

بو گون گئدیرم، سن وردیش ائله، یارین سنی سیناقدان کئچیره‌جم. یامسیلاماغی یاخشی باجارسان یئییه‌جکسن، باجارماسان یئمه‌ک یوخ.

 ائییتمن‌ اوزاقلاشدی. آددیملارینی یاواش گؤتوروردو. اؤیرنجی‌لری ‌ده اونون دالینجا دوزولموشدولر. اونلار قافلانین دورومونو لاغا قویوب گولوردولر.

قافلان یازیقجاسینا مئشه‌لری چاغیردی، الی آمما هر یئردن اوزولموشدو.
بئشینجی گون ائییتمن‌ قافلانا دئدی: گل، بو گون پیشیک موولداماسینی یاخشی یامسیلاسان، سنه بیر یئکه تیکه تزه ات یئتیشه‌جک.

قافلان موولداماغی یامسیلادی. ائییتمن چپیک چالیب، گیجیک‌له دئدی: چوخ بؤیوک ایشدیر، سن لاپ بئله  شوباط پیشی‌یی کیمی موولدورسان. دئییب بیر یئکه تیکه ات آتدی اونا.

آلتینجی گون هله ائییتمن‌ اونون یانینا چاتمامیش قافلان تئز پیشیک موولتوسو باشلادی.

ائییتمن‌ آمما قیزیب آلنینی دویونله‌دی.
قافلان ایسه: باخ من پیشیک موولتوسونو یامسیلادیم.

ائییتمن‌: ائششه‌‌ک‌لری یامسیلا، آنغیر!
قافلان کدرله دئدی:  من مئشه‌ حیوان‌لاری بیله‌سیندن توک تؤکن قافلانام، ائششه‌یی‌می یامسیلایام؟ اؤلوم آیاغینا گئدرم آمما بونا باش ایمم!
ائییتمن‌  قفسدن اوزاقلاشدی بیر کلمه بئله دانیشمادی.
یئددینجی گونده ائییتمن‌‌ قفسه طرف باخیب، آچیق اوزله قافلانا دئدی: ایسته‌میرسن یئیه‌سن؟

قافلان دئدی: ایستیرم یئیه‌م
ائییتمن‌ دئدی: سنین یئیه‌جه‌یین اتین قیمتی وار. ائششک کیمی آنغیر یئمه‌‌یینه چات.

قافلان چالیشدی مئشه‌لری خاطیرلایا، اومودونو الدن وئردی. گؤزلری یومولو آنغیرماغا باشلادی. ائییتمن‌ دئدی: یاخشی آنغیرا بیلمیرسن، آنجاق اوره‌ییم یانیر سنه، بیر تیکه ات آتارام.
سککیزیجی گون ائییتمن‌ دئدی: سنه بیر خوطبه اوخویاجام، قورتاراندان سونرا اونو بیه‌ن، آلقیشلاییب چپیک چال.
قافلان دئدی: اولسون، چپیک چالارام.

ائییتمن‌ خوطبه‌سینی دئمه‌یه باشلادی. دئدی: " وطنداشلار! کئچمیش حادیثه‌لرده بوتون مؤوضوع‌لاردا اؤز موناسیبتیمیزی عکس ائتمیشدیک. بو ذکا و هوشلو اولماق، دوشمان‌لارین توطئه‌سی مؤوجودکن ده‌ییشمه‌یه‌جک، بیز ایمان‌لا ظفر چالاجاییق."
قافلان دئدی: دئدیک‌لرینی آنلامادیم؟

ائییتمن‌ دئدی: سن گرک دئدیک‌لریمی بیه‌نه‌سن، اونلاری خوشلاییب چپیک چالاسان.
قافلان دئدی: باغیشلایین من ساوادسیز بیر جاهیل، سنین سؤزلرین ایسه زنگین‌دیر، بویوردوغون کیمی آلقیشلاییب چپیک چالاجام. قافلان چپیک چالدی. ائییتمن‌ دئدی: ایکی اوزلولوکدن خوشوم گلمز،  ایکی اوزلولری ده خوشلامارام، اونا گؤره ده بو گون یئمکدن قالاجاقسان.

دوققوزونجو گون ائییتمن‌ الینده بیر اوت ـ علف باغی گتیردی،  قافلانین قاباغینا آتیب دئدی: یئ،

قافلان سوروشدو: بو نه دیر؟ من اتجیلم.
ائییتمن‌ دئدی: بو گوندن بری اوت ـ علفدن باشقا بیر شئی یئمه‌یه‌جکسن
قافلانین آجلیغی چوخالدیقدا چالیشدی اوت علفدن یئسین قوخوسو آمما اونو اینجیتدی، اوزونو تورشادیب قیراغا چکیلدی. آنجاق یئنی‌دن اونلارا ساری قاییتدی، یاواش یاواش آغزیندا داد وئریردی.

اونونجو گون ائییتمن، شاگیردلری، قافلان و قفس هامیسی یوخ اولدو. قافلان وطنداش ، قفس شهر اولدو.

  RSS